Җы йигә ахун җўди җўгур да щёнҗуонни чўлэ җочў данлин йигә щёнҗонни зудини, пынҗянлигә вә лон. Ахун е занхали, лон е занхали. Йигә җочў йигә динди бонтуәли. Ахун щинни сылёнди, җыгә лон, данпа, щён чы вәни. Лон е сылёнди, җыгә жын, данпа, лян гун щён да вәни. Йигә җочў йигә хынди вонли йи җынзы зыху, ахун ба лон зу вынди:
“Эй лон, ни йиха чы җигә ён?”

這一個阿訇拄的拄棍兒打鄉莊裏出來照住單另一個鄉莊走著呢，碰見哩個餓狼。阿訇也站下哩，狼也站下哩。一個照住一個盯的望脫哩。阿訇心裏思量的，這個狼，但怕，想吃我呢。狼也思量的，這個人，但怕，連棍想打我呢。一個照住一個恨的望哩一陣子之後，阿訇把狼就問的：
「哎狼，你一下吃幾個羊？」

“Вә дан зуандо ёнчүн литу йиха нын чы сан-сыгә ён. Ни чы җигә ён?” Лон дэ фәди ба ахун е вынди.

「我但鑽到羊圈裏頭一下能吃三四個羊。你吃幾個羊？」狼帶說的把阿訇也問的。

Ахун фәди:
“Хын, ни цэ чыди сан-сыгә ён. Вә дан зуандо щёнҗуон литу, йиха нын чы йибый җязыди ён. Җён ба җыгә щёнҗуонди йибый җязыди ён чы ван, җыхур чы нэгә щёнҗуонди йибый җязыди ёнчидини!”

阿訇說的：
「哼，你才吃的三四個羊。我但鑽到鄉莊裏頭，一下能吃一百家子的羊。將把這個鄉莊的一百家子的羊吃完，這會兒吃那個鄉莊的一百家子的羊去的呢。」

Лон йиха хэли пали. Щинни сылёнди: “Э-я, җы цэсыгә җишыгуй. Вә цэ чыди сан-сыгә ён, җыгә жын йи хуэй чыди йибый җязыди ён. Куэ да җәр зуни, були ба вә е нын чышон.” Лон зэ са хуа ду мә фә, да йигә хогуни тёхачи, зу саншон поли.

狼一下害哩怕哩。心裏思量的：「唉呀，這才是個急食鬼。我才吃的三四個羊，這個人一回吃的一百家子的羊。快打這兒走呢，不哩把我也能吃上。」狼再啥話都沒說，打一個壕溝裏跳下去，走山上跑哩。

Фәли гўҗирди жынсы Щимеев Исмар, 56 суй. Щёртюбе[Щинчү] Щёнҗуон Курдай район Җямбул область Хазах ССР. Щели гўҗирди жынсы Хырхызстан Куәщүә Академяди куәщүәжын Хасанов Махмуд. Щели гўҗирди жызысы 1967 нян җынйүә 16.

說哩古今兒的人是西蔑耶夫·伊斯馬爾，56 歲。索爾托別（新渠）鄉莊科爾代拉庸江布爾沃布拉斯特哈薩克 SSR。¹寫哩古今兒的人是吉爾吉斯斯坦科學阿卡傑米亞²的科學人哈薩諾夫·馬赫穆德。寫哩古今兒的日子是 1967 年正月 16。